الصحفى محمد عبد الماجد

في الوقت الذي كان يعاني فيه دفاع المريخ اتجهت ادارة نادي المريخ الي ان تجود خط الهجوم.
* لا انصلح حال دفاع المريخ ولا تحسن حال الهجوم.
* مجلس ادارة نادي المريخ في يونيو الماضي سجل ريتشارد مشطوب الهلال وشطب محترفه ديالو.
* انتوا ناقصين.
* الارقام الان تقول ان دفاع المريخ في البطولة الافريقية ..في مرحلة المجموعات وحدها استقبلت شباكه 6 اهداف.
* تخيلوا ان هناك فريق في مرحلة المجموعات تستقبل شباكه ربع دستة من الاهداف وهو يلعب في ارضه ووسط جمهوره.
* جمهوركم دا جبتوا ليهو ضغط.
* اما في بطولة الممتاز فان شباك المريخ حتي الان استقبلت 11 هدفا.
* تسجيل المريخ لمشطوب الهلال السابق ريتشارد من اجل تقوية الدفاع تذكرني بهذه القصة.
* (( قالت الفتاة الحسناء لعامل اصلاح السيارات:
- ارجو ان تصلح نفير سيارتي جيدا ، فان فراملي لا تعمل)).
* مجلس ادارة نادي المريخ الان اصلح نفير السيارة ...اما الفرامل فهي لا تعمل.
* ................................
* احد الشعراء كان يقول يا الهي ..اعطني تلالا أتسلقها ، وقوة علي التسلق).
* الهلال الان منح تلك التلال الذي عليه ان يتسلقها...ولعلها تتمثل في المباراة التي علي الهلال ان يخوضها امام فريق كانو.
* نسأل الله ان يمنح الهلال القوة التي تجعله يتسلق تلك التلال لينتصر علي فريق كانو ان شاءالله وان كان كانو يلعب في ارضه ووسط جمهوره.
* من حسن حظ الهلال ان المباراة سوف تلعب ليلا ..وكانو هناك لا يسحن اللعب ليلا لكن نسبة لشهر رمضان فان المباراة سوف تلعبفي توقيت يأتي في توقيت يصب في مصلحة الهلال..وعلي فريق الهلال ان يستفيد من تلك الميزة التي وفرها له الشهر المبارك.
* مباراة الهلال القادمة والتي سوف يلعبها امام كانو هي مباراة الفوز فيها يجعل امر صعود الهلال للمربع الذهبي امر محسوم.
* لذلك يجب ان يذهب الهلال الي نيجيريا من اجل النقاط الثلاث.
* جمهور كانو جمهور مسالم وهو يمكن ان يشجع اللعبة الحلوة اذا احسن الهلال في تقديم عرض يكسب به ود جمهور الفريق الذي يحل عليه ضيفا.
* الجميل ان كامبوس يعمل من اجل كسب هذه النقاط الثلاث وهذا شيء رائع ومن دون شك اذا عرف كامبوس ان يوصل شعوره وحسه هذا للاعبي الهلال فان فوز الهلال علي كانو يبقي امر قريب جدا من التحقيق.
* .....................
* صحيفة الاحداث اليوم في صفحتها الرياضية تنشر حوار لدرايوكان مترجما من صحيفة موزمبقية.
* اكثر ما شدني للحوار هو ان داريوكان وجه انتقادا عنيفا علي مجالس الادارة في السودان وكان قاسيا جدا علي دائرة الكرة في السودان باعتبار ان الاداريين يتركون الحبل علي القارب لاللاعبين المحترفين دون ان تكون هناك مراقبة مفروضة عليهم.
* هذا يفسر الفوضي التي يعيش فيها المحترفيين في السودان اذ نجدهم منحوا الدولارات وتركوا ليفعلوا ما يشاءوا.
* داريوكان ايضا كان عاتبا علي مجالس الادارة في السودان في انهم لا يفوا بالوعود وان اللاعب احيانا يجد نفسه من غير سكن او في سكن غير مريح.
* درايوكان كان يتحدث عن مجلس ادارة نادي الهلال وكان يتحدث كذلك عن مجلس ادارة نادي المريخ اذ قال ان المحترفيين في القمة كلاهما يعاني.
* والكلام لمجلس ادارة نادي الهلال...فهل احسنوا توفير مناخ مناسب وجيد للمحترفين مع فرض رقابة قوية عليهم ومحاسبتهم في اي شيء يقصروا فيه طالما جاءوا من اجل شيء واحد...جاءوا من اجل ان يلعبوا الكرة..لا ان يلعبوا علينا.
* عمرو زكي استغني عنه مدربه في الدوري الانجليزي نتيجة لعدم إلتزام عمرو زكي ولتأخره من العودة عندما شارك مع المنتخب المصري وتأخر في العودة الي انجلترا.
* اما احمد حسام ميدو فيبدو ان ادارة الفريق استغنت عنه نسبة لزيادة وزن المهاجم المصري الذي ظهر مع الزمالك امام بتروجيت بوزن نعتبره قياسي في الملاعب المصرية.
* نختتم هذه الفقرة ونحن ننبه مجلس ادارة نادي الهلال الي الالتفات الي اوجه القصور بتلك الطرفة..لا سيما والدنيا رمضان.
* (( سئل احد اصدقاء برنارد باروخ عما اذا كان السياسي الكهل ، الذي يستخدم سماعة للاذن ، يعاني كثيرا من ضعف سمعه ..فاجاب الصديق:
- لست ادري ...فانني عندما اكون مع مستر باروخ استمع فقط.
* نتمني من مجالس ادارة القمة اللا يكونوا بستمعوا فقط للمحترفين.
* ................
* الاستاذ عبدالمجيد عبدالرازق لا يخفي اعاجبه باللاعب علاءالدين يوسف وكثيرا ما كتب عنه انه افضل محور في السودان.
* الهلالي وعضو ثورة الانقاذ الوطني سليمان محمد سليمان في احد برامج هاروني سئل عن اللاعب الذي يستمتع بمشاهدته ويعتبره لاعبا كبيرا فقال سليمان صاحب العين الكشافة انه علاءالدين يوسف.
* مبارك سليمان احد اهم لاعبي الوسط الذين انجبتهم ميادين السودان قال في برنامج تلفزيوني انه معجب كثيرا باللاعب علاءالدين يوسف.
* لاحظ ان هذه الشهادات في اللاعب علاءالدين يوسف تقال في فترات متباعدة وكلها تقصد علاءالدين يوسف فييرا.
* انور ادم لاعب الهلال السابق الذي جاء من براعم الهلال ولعب في الاشبال ثم في الفريق الكبير ثم لعب في هلال بورتسودان ثم الخرطوم 3 في ذلك الوقت سألنهوا عن اللاعب الذي يشببه فقال انه علاءالدين يوسف.
* اخيرا كان لنا حوار مع لاعب الهلال ورمانة وسطه السابق عبدالمعز جبارة صبحي الذي سألنهوا عن لاعب هلالي حالي يشبه هلال 87 ..فكانت اجابة صبحي من غير تردد هو ان اللاعب الذي يشبه هلال 87 هو اللاعب علاءالدين يوسف.
* كل هذه الاشياء وغيرها لم تأت عفوا ...هي من دون شك يستحقها اللاعب علاءالدين يوسف الذي نري انه مؤهلا للاحتراف في الدوريات الاوروبية لو انه تخلي من عصبيته في الميدان ولعب بمزاج وروح هادية كما لعب امام كانو في المباراة السابقة.
* فييرا امل الهلال فيه كبيرا في مباراة الهلال القادمة امام كانو اذ نعتبره الساتر الاول لدفاع الهلال وهو برفقة عمر بخيت سوف يشكل حماية كبيرة لشباك الهلال.
* وبصم ..ما بصم ..بصم ..
* اخيرا وعلي نفس ما درجنا عليه في كتابة هذا اليوم ..تقول احد الحكم الطريفة ( القاعدة الذهبية عندما تقرأ قائمة الطعام التي تقدم لك في المطعم : " اذا لم تستطع نطق اسم الصنف...فانك لن تستطيع احتمال ثمنه).
* اعتقد ان المريخاب فشلوا في ان ينطقوا اسم (فييرا).
* ملحوظة: بتوع النقطة ديل الصيام معاهم كيف؟.
هوامش
* ناس الهلال ديل قالوا ماشيين مصر ...ما مشوا.
* قالوا ح يجيبوا الصفاقصي يلعب معاهم ما جابوه.
* غير هذا تمارينهم الاخيرة كلها ناقصة وفيها غيابات.
* الاستعدادات دي ما بتجيب ليكم النقاط الثلاث من نيجيريا.
* نحن لو جيتونا من غير النقاط الثلاث ما بنقبل عليكم.
* معقولة ابو نقطة واحدة معسكر في كينيا وانتوا قاعدين لي هنا.
* انتوا بعد كدا بقيتوا ناس كاس ..اتحركوا شوية وقدروا المسؤولية.
* اكرم الهادي سليم عرفها ..ارتاح من المشاركة مع المريخ في البطولة الافريقية.
* ناس عندهم نقطة واحدة ..مفروض يلعبوا بدون حارس مرمي.
* اداء واجب ساكت.
* وارغو وكلتشي رجعوا المريخ الي الخلف.
* كان اخير زمان.
* في ظل غياب هيثم مصطفي في المباراة القادمة يبقي الهلال محتاج الي قيادة رشيدة وحكيمة داخل الملعب.
* حذاري من الكروت.
* ناس الهلال لو لعبوا عشان يمتعوا نفسهم وادوا المباراة بي هداوة سوف يعودوا بالنقاط الثلاثة.
* اهم شيء يلعبوا بعيدا عن التشنج والضغط.
* العبوا كورتكم بس ..وما تشيلوا هم.
* مباراة القمة تبقي لها 18 يوم فقط.
* ناس الهلال مطلوب منهم مراجعة حالات الاصابة التي تعرض لها بعض لاعبي الهلال.
* احمد عادل متل نظام المعسكر مرة يقولوا سافر القاهرة للعلاج ومرة يقولوا سوف يتعالج داخل البلاد.
* ناس المريخ مفروض يدخلوا ليهم معهد في الفترة دي عشان يتعلموا يكتبوا الشكوي.
* ما عاوزنكم تحرجونا تاني مع الكاف.
* اتعلموا اكتبوها ...اصلو نتيجة المباراة ما عندكم فيها امل ..ركزوا في الشكوي.
* سا شنو؟. سا سادومبا. كا شنو ؟. كا كابوندي.
* لو كتبتوها تاني غلط ..الاتحاد الافريقي بشيل منكم (النقطة).
* النقطة عيشتها تطير.
* نقطة في عينك.
* خبر عاجل: كل فريق يمد كراعو قدر نقاطو.


موضوع جديد

* لا اريد ان اعلق عن قضية وارغو ...فهذا شأن شخصي له ..قد تكون تقاليدهم ومجتمعاتهم لا تري في ذلك حرجا.
* لكن علي اي حال من الاحوال فان هذه الواقعة تثبت عدم (التأقلم) الذي يعاني منه وارغو ..فهو مع عدم قدرته علي التعود علي العادات السودانية نجده كذلك لم يحترم تقاليد المجتمع السوداني.
* الواقعة في مجملها تعكس الكثير ..اذ نجد ان اللاعب النيجيري في السودان اصبح يأتي بتصرفات مرفوضة تماما من قبل المجتمع السوداني.
* في الهلال بحمد الله وفضله دخل امبيلي الاسلام واعلن اسلامه ليكون فضل ذلك علي الهلال كثيرا.
* اظن ان فضل الله سوف يشمل الهلال هذا الموسم جزاء علي ان احد لاعبي الهلال الاجانب دخل للاسلام من الهلال.
* هذه نعمة كبيرة.
* نريد ان تبلغ غاية الرياضة ذلك الهدف النبيل..
* في الوقت الذي دخل امبيلي فيه الاسلام ..يأتي وارغو بفعلته تلك ...والفرق واضح وكبير بين ما يحصل في الهلال وما يحصل في المريخ.
* الهلال استغني من كلتشي في فترة مضت للعلة نفسها ليأتي وارغو وكتلشي ويجتمعان في المريخ.
* مع ذلك هناك من يتحدث عن اسباب تدهور مستوي المريخ.
* وهناك من ينتظر شكوي كانو بعد ان رفضت شكوتهم شكلا.
* شكلا دي في رمضان تجيب العطش.
* انتوا شكوتكم عملتوا فيها شنو؟..عشان تنتظروا شكوي كانو.
* المهم ان المريخاب انشغلوا بي لاعبين الهلال ..وفكوا المراقبة للاعبينهم.
* قعدوا يهتموا بالفارغة ..كرت سادومبا وصل..ودي سوزا زعلان..وامولادي اعارته وهمية.
* مرة يقولوا كبير.
* الهلال يعير امولادي ..يقعدوا يكوركوا ويقولوا (الاعارة) وهمية.
* كابوندي دا من الكلام الكتير لما اصابوه (عين).
* لكن بعد هذا الانصراف الكبير نحو لاعبي الهلال المعار منهم الي نيجيريا والقادم للهلال نجد ان بلاوي المريخاب كلها انعكست علي لاعبيهم.
* بقوا كل مباراة يطردوا ليهم (لاعب)...تقول بلعبوا في (بوابة) المستشفي.
* اكرم الهادي سليم الاتحاد الافريقي اوقفوا باقي مباريات المريخ في البطولة الافريقية.
* وقبل ذلك قلق كان واقف 6 مباريات في بطولة الممتاز ..اتفك منها بي استرحام.
* قلق استرحموا ليه.
* ريتشارد استرحموا ليه.
* اكرم اوقفوه...وامير دامر طردوه ..وموسي الزومة شغال بي البونية..وطمبل زعلان...وبلة مصاب...وايداهور اتصاب.
* انا اول مرة اشوف لي (زعل) يعوق ليه لاعب..الكلام دا بالنسبة لي طمبل.
* يا طمبل كنت معزز ومكرم في الهلال هسع بقيت لي مع ناس وارغو وكلتشي ديل ما فاهم اي حاجة.
* بقينا لو عاوزين نشوفك ساكت ..إلا نلقاك في الكنبة.
* عشان تاني تشتغلوا لي بي لاعبي الهلال.
* قلنا ليكم الهلال دا مليان بركة ..ما في عوجة بتجيه قعدتوا تغالطوا.
* الهلال السنة دي غير الجهاز الفني ..ما جاتو عوجة.
* غير خط الدفاع بي اطرافو ..ما جاتو عوجة.
* غير الهجوم كلو ..ما جاتو عوجة.
* غير النجيلة ...ما جاتو عوجة.
* في بركة اكتر من كدا.
* يا ناس الهلال احمدوا الله ساكت ..فريقكم دا الحبة ما بتجيه.
* في واحد قال لي وارغو بكرة ح يكون في (النقطة).
* قلت ليه : هو المريخ كلو في (النقطة)..وارغو يعمل شنو في الحالة دي ...اذا كان فريق لعب 3 مباريات وشال من التسع نقاط (نقطة) واحدة.
* وارغو يعمل ليكم شنو؟.
* المشكلة انو جماعتكم ديل بي (نقطتهم) الوحيدة دي بتفاصحوا.
* يمين بالله (النقطة) دي ما تزيدوها ..نوم ما نخليكم تنومه.
* نقطة....نقطة يا عالم.
* الحالة التي تثبت فوضي لاعبي المريخ في ظل اهتمامات اعلام الهلال بلاعبي الهلال هي ما تعرض له لاعب المريخ العجب يوم مباراة المريخ وزيسكو حيث تعرض العجب لهجوم من جماهير المريخ حتي ان دموع احد افضل لاعبي المريخ علي مدي التاريخ تساقطت.
* والحالة الثانية التي تثبت هوان لاعبي المريخ هي الصور التي اصبحت تأخذ للاعبي المريخ في كنبة الاحتياطي ..واحد زعلان وواحد متمحن وواحد ما عاوز يظهر وواحد واضع ايدو علي خدو.
* النقطة تخجل.
* يا ناس المريخ لو قعدتوا تتابعوا لاعبي الهلال كدا ..ما بتحصدوا إلا الهشيم لأن المكر السيء يحيق بأهله.
* لو اشتغلتوا لي بالمواضيع الميتة دي (النقطة) ذاتها بشيلوها منكم.
* ناس زيسكو ديل عندهم مهاجم المباراة الفاتت كان ما لاعب..المهاجم دا قالوا ليك لو شاف (نقطة) المريخ دا بشيلها منهم.
* ابقوا عشرة علي (نقطتكم) دي ..ما اظن تقدروا تزيدوها في رمضان دا.
* انتوا في الفطر ما عملتوا حاجة ....عاوزين تعملوا في الصيام.
* نقطتي المست غرورك وفرقتنا.
* نقطة ..نقطة الليل نعدو.
* ما في حتي (نقطة) واحدة بيها اتصبر شوية.
* نقطة والسفر.
* النقطة الواحدة ما بتصفق.
* النقطة ما بتعلي علي الشولة.
* نقطة وصيفنا ولا نقاط الهلال.
* العين بصيرة ..والنقطة قصيرة.
* النقطة ما بتشكر في بطولة الاندية الافريقية للابطال.
* نقطة ما عندك ليها رفيقة..شوف ليها طريقة.
* النقطة ما بتأبي الزيادة.
* النقطة كان بقت فأس ما بتكسر الرأس.
* حبيبك لو بقي عسل ..ما (تنقطو) كلو.
* نقطة علي نقطة تجدع بعيد.
* ملحوظة: خلاص يا الهلالاب عاوزين تخلوا (نقاطكم) السبعة وتقبلوا علي (نقطة) المريخ.
هوامش
* قالوا المريخاب عاوزين يدخلوا ليهم صندوق ...الختة (نقطة)...الصرفة ثلاث نقاط.
* مريخابي تاني خالص ..مشي لي دكتور عشان يشوف ليه رخصة يفطر بيها ..الدكتور قال ليه انت بتشكي من شنو؟..المريخابي قال ليه: بشكي من (النقطة) الواحدة دي...واشار للضرس.
* مريخابي غير المريخابي الفوق داك..ود خالتو ضرب ليه من روسيا قال ليه : اجيب ليك شنو معاي من روسيا؟.
* المريخابي ما كذب قال ليه : جيب لي (نقطة).
* انت قالوا ليك روسيا فيها (نقاط).
* هلالابي لاقي ليه مريخابي الصباح ..قال ليه : معقولة رمضان ظهر فيك من اول نص ساعة.
* المريخابي قال ليه : دا ما رمضان ...دا كلو من (النقطة).
* واحد زعلان قال محتار ...(الهلال) دا ما فيه ولا نقطة ..عندو سبع نقاط...المريخ فيه ثلاث نقاط ..عندو نقطة واحدة.
* مفروض المريخاب يشتكوا.
* لكن المشكلة بتوع النقطة الواحدة ديل ما بعرفوا يكتبوا الشكوي.
* قلنا ليكم سا شنو؟.
* سا سادومبا.
* طيب كا شنو؟.
* كا كابوندي.
* مية مرة يقولوا ليكم الكلام دا وما تفهموا.
* وارغو في صحيفة (الاسطورة)...قال انه كان منتشيا وبروح معنوية عالية بعد فوزنا الكبير امسية الاربعاء علي الموردة.
* انتوا يا مريخاب جايبين ليكم لاعب ينتشي عشان فريقه انتصر علي الموردة.
* يعني لو انتصرت علي الهلال كنت ح تعمل شنو؟.
* المسكين كان مات فيها.
* الظاهر ان وارغو فعلا الي الان ما اتأقلم علي الاجواء في السودان.
* محترف بي خمسة مليون دولار ينتشي عشان فريقه انتصر في الدوري المحلي.
* غايتو وارغو دا بعمل حاجات غريبة شديد.
* عدم التأقلم كعب.
* انتوا ريتشارد وين؟.
* يكون برضو زي ما قلنا ما قادر يتأقلم.
* طيب طمبل مالو؟.
* طمبل عندو اصابة في (الكرت).
* ومجاهد.
* انا عارف ..ما تكتر الاسئلة.
* الهلالاب ديل فكوا اي حاجة وقبلوا علي مجاهد.
* الهلالاب ديل بعملوا في حاجات بعرفوها براهم.
* المهم عندنا ان يعود الهلال من كانو بالنقاط الثلاث..عشان نتفرغ لبتوع النقطة ديل.
* في مباراة الهلال القادمة يعود كابوندي واحمد الفاضل وسيف مساوي..ويغيب هيثم مصطفي.
* البرنس عاوزنو يأخذ راحتو ..عشان تفجيرات 11 سبتمبر.
* نجيلة الهلال تاني قفلوها لليوم دا.
* نظام النجيلة بتستعد للتفجيرات.
* مفروض المريخاب يعملوا نفرة للنقاط.
* عملوها لينا كلها طوب.
* اها ان شاءالله (الطوب) يبقي ليكم نقاط.
* في هذه الايام الجميلة عاد الزميل الاستاذ خلف الله ابومنذر للكتابة ..ونتمني ان يعود كذلك معتصم محمود.
* يا معتصم السوق دا ما يفوتك.
* ورمضان كريم ..نسأل الله ان يجعله خيرا علينا وعليكم وان يحظي فيه الهلال بالانتصارات والتوفيق..وتصوموا وتفطروا علي خير.
* خبر عاجل: الليلة اليوم دا مالو طويل كدا.


موضوع جديد [/FONT


* يتحدث المريخاب (بتوع النقطة الواحدة) ..في انهم مازال املهم باقي في الصعود للمربع الذهبي في البطولة الافريقية.
* من حق ابليس ان يحلم بالجنة ..لكن من الضروري ان يكون ذلك الحلم بمنطق.
* ابليس ذاتو ما بحلم ساكت.
* تتخيلوا ان المريخ (بتوع النقطة الواحدة) بحلموا بالصعود وبستكثروا علي الهلال ان يحلم حلم مشروعا بالصعود للمربع الذهبي وهو صاحب سبع نقاط.
* يعني ابونقطة ...بضحك علي ابوسبع نقاط.
* طيش المجموعتين (ابو نقطة جنان) ..بحلم يصعد ..وبعد ما يصعد يشيل الكأس...هو الحلم بي قروش يا عالم.
* قلت ليكم نحن ما معترضين علي هذا الحلم ...لكن المريخاب للاسف الشديد حلمهم هذا بقرونه بي حلم اكبر.
* عاوزين تعرفوا الحلم الاكبر دا شنو طبعا.
* المريخاب بحلموا الهلال ما يصعد.
* املهم في الدنيا دي انو الهلال ما يصعد.
* رغم اننا لو اعتبرنا مجازا ان المريخ سوف يصعد للمربع الذهبي فان الهلال يبقي تلقائيا هو صاعد...صاعد.
* صعود المريخ يعني ان يعرقل المريخ زيسكو في بلده ...وزيسكو اذا خسر في بلده بكون طلع وشبع طلوع.
* كذلك لا بد ان ينتصر المريخ علي كانو في ام درمان وعندما يخسر كانو في ام درمان حظوظه سوف تكون ضعيفة جدا.
* مباراة المقبرة في 11 سبتمبر ...ناس المريخ مفروض ما يحلموا بي نقطة منها.
* ولا نقطة يا ابونقطة انت.
* نحن النقطة في الموز بنكجنها.
* كلموهم يشوفوا ليهم حلمة تانية...حلمة معقولة شوية ...حلمة بتتبلع.
* ما يهمنا هنا هو القول ان المريخ ابو نقطة واحدة اذ صعد فان صعود الهلال ابوسبع نقاط سوف يكون امر حتمي ولو خسر الهلال لا قدر الله جميع نقاطه القادمة.
* لكن نحن هذا لا يعجبنا ...لا نريد للهلال هذا الصعود (الميت)...ولن نقبل بصعود الهلال نتيجة لمباريات المريخ سلبا كان ذلك او ايجابا.
* الاصل ما بتبع الضل.
* لذلك يبقي من المهم ان يأتي الهلال من كانو بالنقاط الثلاث...عشان الموضوع بالنسبة لينا يكون انتهي.
* لا نريد للهلال ان يفقد قيمته تلك.
* الهلال الان صاحب اعلي نقاط في المجموعتين ..اذ نجده هو الفريق الوحيد في الثمانية فرق وصل للنقطة السابعة.
* والهلال هو الفريق الوحيد بين الثمانية فرق الذي لم يخسر حتي الان.
* والهلال يتميز في انه هو النادي الوحيد بين الثمانية الكبار ناقص واحد الذي لم تستقبل شباكه هدفا في مرحلة المجموعات.
* في الوقت نفسه نجد ان المريخ هو النادي الوحيد صاحب النقطة الوحيدة.
* نقطة فرد واحدة.
* يعني وسط كل هذه الاندية التي صعد بعضها لاول مرة للدور الثمانية ، نجد ان المريخ هو الوحيد صاحب النقطة الوحيدة.
* المريخ كان صاحب اشهر (نقطة) في البطولات العربية...التاريخ يعود نفسه الان اذ نجد ان المريخ الان صاحب اشهر نقطة في البطولة الافريقية.
* الشيء الذي يجعلنا اكثر حيرة هو ان المريخاب اعترضوا علي اعلام الهلال الذي تناول خساراتهم الاخيرة واعتبروا ذلك تدخل من ناس الهلال.
* رغم ان اعلام المريخ ليه شهرين بكتب عن كرت سادومبا.
* تقول الكرت دا جايبنوا من البيت الابيض.
* بل ان اعلام المريخ لم يجد في نفسه حرج في ان يتبني شكوي فريق كانو للهلال ..رغم ان الشكوي لم تقدم رسميا.
* اعلام المريخ الذي تبني شكوي كانو (الوهمية)...هل يستنكر ان يكتب اعلام الهلال عن خسارة المريخ امام زيسكو والمريخ يلعب في ارضه ووسط جمهوره امام فريق يلعب بي عشرة لاعبين فقط.
* واعلام المريخ الذي كتب عن دفرة فلافيو لعمار مرق ..يريد من اعلام الهلال ألا يكتب عن سكواها السواها.
* واعلام المريخ الذي مازال الي الان يكتب عن طرد اللاعب علاءالدين جبرئيل في تونس قبل اكثر من ثلاث سنوات..يعترض علي ان يكتب اعلام الهلال عن طرد اكرم الهادي سليم.
* نحن المريخ لا يهمنا كثيرا...بقدر ان الذي يرش الهلال بالماء يجد نفسه يوما ما يرش بالدم.
* الذي يجب ان ينتبه له الهلال الان هو ان يخرج من هذه المعمعة بالخروج بالنقاط الثلاث في المباراة التي سوف يلعبها الهلال مع كانو في نيجيريا.
* لاعبو الهلال امام تحدي حقيقي لاثبات ذاتهم وافضليتهم للفوز بالنقاط الثلاث.
* حتي لا يعتقد البعض ان اعلام الهلال يكتب عن فريقه بصورة قد تضر بالفريق...نقول ان الهلال عندنا مازال (كعب) ...وان الهلال اذا لم يعد من كانو بنقطة علي اسوأ الفروض ...فاننا لن نحلم بالكأس.
* سوف نطلب من لاعبي الهلال ان يثبتوا انهم الافضل وانهم الاجدر بتحقيق الكأس.
* سوف نطالبهم ان يردوا الجميل الي هذه الجماهير التي تعشقهم بالعودة من نيجيريا بانتصار كبير ان شاءالله.
* نملك لاعبين كبار اكتسبوا مع عمرهم الصغيرة خبرة كبيرة..ونملك دفاع اقل ما يمكن ان نقول عنه هو انه دفاع محترم.
* نملك حارس مرمي يمنحنا الثقة كل ما شاهدناه بين الخشبات الثلاث.
* نملك جهاز فني يقوده مدرب عالمي ..عارف هو بعمل في شنو؟.
* كل هذه المعطيات في ظل مجلس ادارة شايف شغلو ..يجعلنا نثق في ان العودة بالنقاط الثلاث سوف تكون متاحة للهلال باذن الله وتوفيقه.
* البطولة الافريقية بعد الجولة القادمة ..لا نعرف ماذا سوف يحدث فيها..لذلك علي الهلال ان يحسم امر صعوده من نيجيريا.
* الحمدلله ان اعلام الهلال يكتب بهذا الفهم ..ومطلوب من لاعبي الهلال ان يعرفوا ان هدفهم الاساسي في نيجيريا هو ان يعودوا بالنقاط الثلاث.
* دفاع كانو يغري علي ان يعود الهلال ظافرا باذن الله وتوفيقه.
* تلك (الجرأة) التي تزرع في لاعبي الهلال سوف يكون الجزاء فيها ان شاءالله النقاط الثلاث.
* ان الهلال اذا اراد ان يفوز بالكأس الافريقي عليه ان يعرف ثقافة الفوز خارج ارضه..لان لغة الفوز خارج الارض هي اللغة الرسمية الاولي للفوز بالبطولات.
* ملحوظة: واريت ابو نقطة طائر.
هوامش
* الاخ الاستاذ نميري شلبي يكتب دائما بطريقة ...نقطة وسطر جديد ...اها يا نميري النقطة بقت عليكم ...وين السطر الجديد.
* مباريات المريخ يجب ان يضاعف لها قوات الاحتياطي المركزي.
* شنو في كل مباراة عاملين لينا شكلة.
* بيني وبينكم (النقطة) حارة.
* الاخ اسامة جويلي قال الجماعة ديل في رمضان بصوموا بي نقطتهم دي كيف؟.
* نقطتكم دي ما تسحروا بيها.
* الزميل مبارك ودالسما ..يري ان ما يفعله المريخاب الان من هضربة وجوطة ...نتيجة لأن البنج فكّ.
* لكن النقطة بتعمل اكتر من كدا.
* واحد قال للتاني ...الهلال ظهر ..ورمضان ثبت.
* التاني قال ليه : الهلال بي سبع نقاط وما عاوزوا يثبت.
* في واحد تاني شاف هلال رمضان بعد الفطور كبير ...قال ليهم دا ما هلال نقطة واحدة ..دا هلال سبع نقاط.
* طبعا في الفطور في جماعة كدا من يشوفوا الهلال يقولوا ليك: دا ما هلال يوم واحد ...الجماعة ديل اكلوا ليهم يوم.
* يوم في عينك.
* مريخابي قال : والله الهلالاب ديل لو عملوا ليهم طابق تاني مع النقاط السبعة ديل ..إلا نقلب ونشجع اهلي الخرطوم.
* اخير ليكم اهلي الخرطوم ..ترتاحوا من النقة الكتيرة.
* امير دامر شاف ناس المريخ ما سألوا موسي الزومة ..ولا سألوا اكرم الهادي سليم ..عشان كدا قال احسن اخذ لي (كرت احمر).
* اقول ليكم حاجة ...انتوا عارفين المريخ دا بقي في كل مباراة بيأخذ كرت ليه؟.
* عشان الجماعة ديل اهتموا بي (كرت) سادومبا اكتر من (الطابق التاني) حقهم.
* كرت ايفوسا كيف؟.
* المريخاب فرحوا عشان غلبوا الموردة وهم لاعبين بي عشرة.
* نسوا الحكم.
* انتوا لو فرحانين ...ناس زيسكو يعملوا شنو؟.
* المريخ يهدد بالانسحاب.
* الكلام دا نحن عملناه قبل خمس سنوات ..انتوا يا دوب في (التهديد).
* قلنا سا شنو؟.
* سا سادومبا.
* بصم ما بصم بصم ما بصم.
* طيب كا شنو؟.
* كا كابوندي.
* مية مرة يقولوا ليكم كدا ..وبرضو ما بعرفوا يكتبوا الشكوي.
* صلاح ادريس واضح انه هو الذي يحكم المريخ.
* قال ليهم سجلوا ريتشارد ..سجلوه.
* وارغو ذاتو خلاهو ليهم ..بلعوا الطعم وسجلوه.
* اكرم الهادي سليم قال ليكم عاقبوه ...اليوم التاني عاقبوه.
* طيب يا جمال الوالي انت زعلان في شنو؟.
* لكن لو جينا للجد (النقطة) تزعل.
* نقطة ليها ضل.
* ضل في عينك.
* كلتشي زي السعودي بسجل في المباريات الميتة.
* المباراة التي ينتظر فيها كلتشي ..دائما ما يخلف فيها الموعد.
* خبر عاجل: النقطة بقت نكتة.


موضوع جديد

* مما لا شك فيه ان صلاح ادريس رئيس نادي الهلال تطور اداريا كثيرا واكتسب خبرات كان يفتقدها في بداية عهده كرئيس لمجلس ادارة نادي الهلال.
* كان صلاح ادريس في سنواته الاولي في ادارة مجلس نادي الهلال شديد الصراعات والخلافات.
* خلافاته لم تكن قاصرة فقط علي الذين يخالفونه في الاراء وينتمون لتنظيمات اخري..بل كانت خلافات صلاح ادريس تشتعل مع اقرب الناس اليه.
* زول بشاكل (ضلو)!!.
* ويمكن ان نقول ان صلاح ادريس في سنته الاولي كان كلما كنت قريبا منه فذلك يعني انك اولي بان يختلف معك.
* مجلس ادارة نادي الهلال في بدايات صلاح ادريس التي كان فيها رئيسا للمجلس كان يمور بالخلافات والصراعات وقد شهدنا كيف كان الخلاف محتدا مع امين خزينة الهلال السابق الامين البرير الذي لا يختلف اثنان علي هلاليته.
* حوض البط ..عملوا لينا حرب البسوس...وداحس والغبراء.
* في الفترة الاولي لصلاح ادريس في الهلال نجد ان الفريق اضعفته بشكل او باخر الصراعات التي دخل فيها مجلس ادارة نادي الهلال وكان الاتحاد العام لكرة القدم طرفا اصيلا في تلك الصراعات.
* بل امتدت خلافات مجلس الهلال للمفوضية ووزارة الشباب والرياضة والثقافة ولم يسلم احد او هيئة من صراعات صلاح ادريس.
* كان يمكن في تلك الفترة ان يحقق الهلال كأسا خارجيا لو ان الاجواء وقتها كانت كما هي الان.
* نحن لا نقول ان صلاح ادريس لم يكن محقا في خلافاته وصراعاته ..ولكن نقول ان (الحكمة والحلم) افضل الاشياء التي يمكن ان تحارب بها وتصارع ..ونتائج تلك الصراعات والخلافات ان كان سلاحك (الحكمة والحلم) هو دائما الانتصار والفوز المبين.
* الهلال في السنوات الماضية كان سلاحه (الانسحاب)...وقد حقق الهلال مكاسب عديدة بهذا السلاح ..لكن صلاح ادريس ومجلس ادارة نادي الهلال يحقق الان مكاسب مضاعفة دون ان يشهر سلاح الانسحاب او يلوح به.
* الان الهلال عبر القانون والمنطق يكسب ...وانتصارات المنطق والحوار لا يماثلها انتصار.
* الي جانب تلك الانتصارات التي يفرضها المنطق والقانون ..ينتصر الهلال في ميادين الكرة ويحقق اغلي الانتصارات واجملها.
* الهلال دار نقاش وحوارات واراء وهي ميادين طبيعية ان يكون فيها خلاف ..لكن دعونا نختلف بادب الهلال.
* دعوا (التسامح) اسمي ما عندنا.
* في هذا العام مد صلاح ادريس يده لكل الهلالاب..ليس هنالك هلالابي يستحق ان تجاهره بالعداء.
* كان عبدالمجيد منصور رجل الهلال القوي يسافر وهو مريض مع الهلال الي جنوب افريقيا في العام الماضي.
* قاهر الظلام يفعل ذلك ويحضر تمارين الهلال ويساند الفريق بقوة رغم الخلافات الحادة التي كانت طابع العلاقة بين عبدالمجيد منصور وصلاح ادريس.
* اشرف سيد احمد الكاردينال هو الاخر بعد خلافات طويلة مع صلاح ادريس نجده الان قريبا من الهلال ..يدعم الهلال ويحفز لاعبيه ويعلن عن وجوده متي ما كانت هناك حاجة له.
* حكيم الهلال طه علي البشير من الرجال الذين يحتاجهم الهلال وهو من مراجع الحكمة في الهلال.
* الحكيم دعم تأهيل استاد الهلال وكان موجودا في ذلك المحفل الذي يجب ان يكونوا فيه الهلالاب.
* شمل الهلال نتمني ان يسع الجميع ليستفيد الهلال من كل ابنائه ..سليمان محمد سليمان وعابدين الطاهر وعبدالرحمن سرالختم والامين البرير ..كل اولئك يحتاج لهم الهلال ..وليس هناك اجمل من ان يضم الهلال ابناءه في حضنه لينعم بهم وينعمون به.
* طريق الهلال للبطولة الخارجية يمر عن طريق وحدة الاهلة ووحدة كلمتهم...والقوة دائما في التجمع والتوحد.
* من الاشياء التي نشهد فيها بالتقدم عند صلاح ادريس هي عودة المياه الي مجراها الطبيعي بين الاتحاد العام لكرة القدم والهلال.
* احترام قيادة الكرة في البلاد من قبل قيادات الهلال وتبادل الاحترام بين الاطراف في الهلال والاتحاد امر يعود علي الهلال بالاستقرار.
* الملاحظ ان صلاح ادريس بدأ اكثر حدة وخلافات ثم اصبح يكتسب المرونة يوما بعد يوم حتي وصل لمرحلة كنا نتمناها لمن يشغل منصب الرئاسة في الهلال.
* وفي ذلك نجد ان صلاح ادريس عكس جمال الوالي الذي بدأ متفقا عليه كرئيس نموذجي ومثالي للمريخ واصبح يفقد كل يوم شيئا من اراضيه...حتي اننا نتوقع ان يأتي يوم وتهتف جماهير المريخ في وجه رئيسها (المحبوب) الذي اصبح يفقد وقاره يوما بعد يوم.
* الشيء الذي يجب ان يلتفت له مجلس ادارة نادي الهلال هو ان يواصل اصلاح استاده وملعبه ففي ذلك دفعة معنوية كبيرة لجماهير الهلال وللهلال ككل ادارة وجهاز فني ولاعبين.
* الحمدلله ان استاد الهلال تحسن شكله كثيرا وحق لنا ان نفخر به ...وما يسعدنا اكثر ان لجنة تأهيل الاستاد واصلاحه سوف تواصل عملها بشكل دائم ومستمر حتي بلوغ الطابق الثاني الذي نحتاجه بشدة نسبة لجماهير الهلال الكثيرة والكثيفة والتي اصبحت تتواجد اضعافا مضاعفة خارج الاستاد عندما يكون الهلال لاعبا او متمرنا..وهذا يستوجب ان يستثمرالهلال جماهيره وان كان ذلك باضعف الايمان عبر سعة المدرجات فقط.
* في بدايات جمال الوالي كانت جماهير المريخ تصبر علي مجلس الادارة بسبب الاعمال التي كان يقوم بها مجلس المريخ في استاد المريخ وكان اعلام المريخ يفتخر بذلك ويسخر من سوق القش (استاد الهلال).
* كانت جماهير المريخ تصبر وتتحمل كل النكسات في سبيل ان يصلح المجلس الاستاد.
* الان تري ما الذي يمكن ان يصبر جماهير المريخ ..خاصة ان الهلال تصدر الممتاز وتصدر مجموعته في البطولة الافريقية بفارق 6 نقاط في كل بطولة من المريخ رغم ان الهلال كان يلعب بعيدا عن ملعبه.
* يا فرحة جماهير الهلال بفريقها الذي يمضي بعيدا في البطولات المحلية والقارية في الوقت الذي نجد فيه العمل والاصلاح مستمرا في استاد الهلال.
* الاجواء الان علي النطاق الهلالي مهيأة لاستقبال بطولة خارجية.
* واول علامات البطولة الخارجية هو ان ينتصر الهلال في نيجيريا علي كانو لنزداد ثقة بالفوز بكأس البطولة.
* نعم ان مباراة الهلال القادمة امام كانو يجب ان تكون من اجل الثلاث نقاط.
* تلك النقاط الثلاث سوف تحسم صعود الهلال للمربع الذهبي وسوف تجعله قريبا من تصدر المجموعة الاولي.
* ملحوظة: قولوا يارب.
هوامش
* لا ادري لماذا لم يرض جمال الوالي بنصائح صلاح ادريس؟.
* وانت ما بتعرف (عديلك) من عدوك...ضيعوك ...واستغلوا الطيبة في قلبك وبي اسم المريخ (خدعوك).
* مريخ مين يا عم؟.
* قبل كدا المريخ لعب مباراة اعدادية في نيرويبي كانت امام فريق سوفاباكا الكيني وكان طاقم التحكيم الذي ادارها ..طاقم تحكيم نسائي.
* الان لعب المريخ في البطولة الافريقية امام زيسكو ..والمباراة راقبتها (امرأة).
* غايتو نحن الهلالاب الاتحاد الافريقي عارفنا..لو جاب لينا (امرأة)..الدم بصل الركب.
* المشكلة (الصفوة) ديل عارفين ان المباراة مراقباها (امرأة) وبرضو بجدعوا بالحجارة.
* (حورجتونا) يا عالم.
* لو مراقبها راجل ما بعملوا كدا.
* الطريف ان جمال الوالي بعد المباراة هاجم (المرأة).
* في الهلال نحن ما عندنا حاجات زي دي.
* والله يجيبوا لينا مراقب (امرأة) والا الحكم تكون امرأة ..الفريق البنلعب امامه ده بيأخذ تسعة.
* انا اخوك يا زينب ..كمان نحن بنلعب.
* قالوا ليك في واحد جديد في الخرطوم ...جديد (كرت).
* الزول دا بسمع ليك في محلات السمك والباسطة والبسبوسة ..صاحب المحل بسأل الزبون بقول ليه : (سفري وإلا محلي؟).
* الموضوع دا أرقو شديد ..ما عارف الزول دا بكون قاصد شنو بي (سفري وإلا محلي).
* عاوز يموت ويعرف سفري والا محلي دي شنو؟.
* طبعا خجلان يسأل من (سفري والا محلي ) دي يعني شنو؟.
* هو كان بمشي المطاعم يقعد يراقب في الناس البتشتري ..كان بشوف صاحب المحل بسأل الزبون بقول ليه : (سفري وإلا محلي؟).
* كان بشوف الزول البقول : (سفري) ..بلفوا ليه الحاجة الاشتراها وبشيلها معاه.
* والزول البقول : (محلي).. بقعد قبلو يضرب الحاجة الاشتراها دي زي الما حصل حاجة.
* يضرب هو وكدايسو.
* لكن برضو ما قدر يفهمها ليكم ..ما عرف سفري والا محلي دي يعني شنو؟.
* اخر حاجة وقت رأسو ضرب خالص ..عندو واحد قريبو ...مفتح وعلم الهلال ما بنزلوا من رأس البيت حقو.
* زول مفتح شديد.
* صاحبكم مشي عليه في بيتو وقال ليه : تعال هنا يا قريبي ..انت سفري وإلا محلي دي شنو؟.
* الزول ضحك فيه وقال ليه : عليك الله انت هسع ما عارف سفري وإلا محلي دي شنو؟...قاعد ليك 17 سنة في الخرطوم وما عارف سفري وإلا محلي.
* عايش كيف؟...(حورجتنا) مع الاجانب وطلاب الدراسات العليا.
* قال ليه : والله ما عارف سفري وإلا محلي يعني شنو؟.
* زولكم قدر ما حاول يشرح ليه حكاية سفري والا محلي ..صاحبكم ما فهم الحكاية.
* رأسو ..ربط زي الناس الما بعرفوا يكتبوا (الشكوي).
* في النهاية زولكم زهج منو؟.قال ليه انت عارف (محلي) دي زي شنو؟.
* قال ليه : زي شنو؟.
* محلي دي يعني زي قون حمودة بشير ..الكورة بديها (لمسة) كدا وتلقاها جوة الشبكة ..(هبشة) بس ..وتلقاها في القون. يعني بكتلها ليك قبلها.
* صاحبكم قال ليه : بس كدا انا فهمت ...(محلي) دي وقعت لي ..طيب (سفري) يعني شنو؟.
* اها زولكم دا قدر ما شرح ليه ..صاحبكم ما فهم (سفري) دي يعني شنو؟.
* اخر حاجة زولكم تاني زهج منو؟..قال ليه : تعرف (سفري) دي زي شنو؟.
* قال ليه : زي شنو يا ابوالعريف؟.
* قال ليه : سفري دي زي اقوان مهند الطاهر ..بتجي من بعيد من (سقط لقط).
* زولكم قال ليه : طيب ما تقول كدا من الصباح.
* اها في اليوم التاني زولكم من صباح بدري مشي ليه علي محل بتاع سمك.
* وقف في المحل .علي فد كراع ...كراع واقف بيها وكراع مسبعة في التانية.
* انتوا متخيلين الوقفة دي والا عاوزين تفوتوني ساكت.
* الوقفة دي لو ما اتخيلتوها لي (القصة) دي كلها بتبوظ.
* المهم زولكم واقف كدا ..قال لبتاع السمك عليك الله اعمل لي تلاتة طلبات.
* بتاع السمك قال ليه : سفري والا محلي؟.
* زولكم قعد يضحك ...ويقهقه ..قال ليه : سفري يا اخوي معاك معلم ..و(الهوبة) اعملها لينا برة.
* هوبة في عينك.
* هوبة في البرد دا.
* خبر عاجل: اكيد عاوزين تسألوني عن قصة الرجل الذي نصح ظله...انسوا بس.